Catanduanes Forum

Iba – ibang taho ang mga gaparingkat sa topload. Kung inano yan surò-suan iso man dun sa kilang hinarian. May mga naki sapalaran sa Manila boda sa iba ibang lugar. Ikan man mga estudyante na nang asyab ning ulak sa iba ibang unibersidad. May mga negosyante na naki bungkogan ning matrirong sentimos sa kilang mga katagbuan. Minsan may mga criminal boda mga pusher na gapangalas man ning kilang baga mga sikop na mata. Pero ang karinisang taho sa topload yo mga bakasyunista haring Manila na kung mag bado kuntodo mapa compleaño. Iso toyan yo baga loog ning lata ning biskwit na masiram na kitaon sa ibabaw ni ano sa irarom. Pero sila yan pagasa ning mga tambay ta pag nagka giripitan ipabakar nila yan sadong taon na pinagaran. Pero maski por papano daa sadong semana lamang nilang pina ogma yo kilang mga kamaradas. Maski si Kiyosaki sasakitan mag kumbinsi para magbuhin lamang sila ning for the family. Ang iba ngani mina utang pa sa kilang magurang ning pamasahe pabarik. Kung inano ka burgis pag abot iso man yo pagka porlon nintoyan pabarik.

Ang istorya ning mga taho sa topload minsan mamondo, minsan kahehelak, minsan maogma, minsan maludog sa oro. Pero ang mga istoryang too yan nakapasiram sa pagsakay sa topload. Ang singko oras na byahe baga man sana sadong oras pag magaya gaya yan ga sakay. Pero bokong gabos na pagsakay sa topload maogma. Minsan iabot ka man ning uran, kung dimalas pa bagyo boda landslide yan gahurat saimo. Ang nobenta y sais na kilometro pwedeng maging dawhang ardaw na byahe. Dintoyan baga gold yan sadong latang biskwit. Ninto ka aram tana kung tayon ta maski medyo mayaman ga bitbit man nintoyan. Dito sa mga byaheng too nag torogas yan boot ning mga taga sa amo. Sa mga arog nintong panahon pirmeng nate testing ang pagkasarado ning gabos. Ang mga bus pirmeng may pasigurong trapal ta maski inano kainit sa virac mai mo sigurado kung baga mga bareta yan togno ning uran sa caramoran. Pag binikrad nayang trapal, kung ano ano na ang nangyayari. May mga seryosong huron huron na natatapos sa siram ning buros. Kasabay ning pag digar ning bandara ang turiik na mai mo aram kung sa kuwaw, aswang o inaswang. Pag gàbi ang byahe, mas pasimple. Kung inano katoninong iso man yan pag ikot ning kamot na baga torompo katinong. Kung toyohon mo ka s`idipa mai kang makikita ta hona mo mga gakatorog na baka. Kung minsan mangalas ka kung painano iga làmid yan ungar.

Ang buhay baga buhay sa topload. Kaipuhan mo minsan mag usog para madagos ang byahe. Kaipuhan mong maging honesto sa pagtao ning pamasahe. Kaipuhan mong mag hinunyog para matanyog. Kaipuhan mong mag sakripisyo para maka abot sa imong destino. Kung estranghero ka sa pupuntahan mo, mai dapat mamwersa o mag agrangay kung mai mo nakukuha ang mga gusto mo. Ta kung bayolente ka, maging trahidor ka, malamang mahurog ka sa pari-as.