Catanduanes Forum

SARUGSOD

Maing duda sado o pilang beses sa buhay ning taho masasarugsudan kita. Parte na yata ning pagkabuhay toyan. Mai man iga toyo pero minaabot talaga. Baga man sana ardaw na piga sundan ning dorom.

Ang lanit ning sarugsod o ti-onay man namamati hanggang turang. Ang iba ngani kung maluya luya ang resistensya piga kalintura. Iso toyan yan ehemplo ning maski kadagi naka puring man. Habang ga kadagi mas lalo ang huto huto. Kung inano kasakit kuon ang tungaw iso man tooyan. Ang kaibahan lang kaipuhan mo pa minsan magpa tabang. Ang pinakamahapdos na sarugsod daa ang ti-onay ning tayong. Kung inano kahapdos mamoot boda mawaran iso man kasakit magsungkit para mawara ang ti-onay o sarugsod.

Kung idukot ta to sa pagkabuhay ning sadong taho, ang sarugsod o ti-onay iso toyan ang mga problema o pa gùbat sa atong buhay buhay. Minsan masakit na solo solo ka lang. Kaipuhan mo ning pamilya o mga barkada para mainaan lamang kung ano man ang darà-darà ta sa panahon ning kasakitan. Masakit talaga mag resolba ning problema lalo na kung ang aram ta lang tupasan toyan. Sabi ngani masakit makidaragan laban sa problema pero kaya mong padipisilon sa problema na maka angtos. Baga man sana sa paghari ning sarugsod. Kaipuhan mong harion ang problema ning bilog ta kung ikan mabuhin parehas sa sarugsod maga sapor ka man lang ning hapdos ning ginhawa o puso sa imong problema. Harimbawa ang problema mo nalupa nang tingo. Mai mo na pagpa pastahan para magpa butak ka pa magkaon ning mga made in Germany na chocolate ta mamamati mo man sana sa madari o huray pa man na panahon na ang problema mo talaga lupa na ang tingo mo. Kaya malani ka na naman sa dentista mo para makimahelak na luway luwayon ang pag iniksyon. Syempre eksampol man sana to ta grabe na baga ang teknolohiya ninto para sa pag repair ning tingo. Ang gusto kong sabihon mai pwede na pa tingi-tingi ang gawi ning sadong taho. Maski siin na bagay lalo na sa pagtubod ta sa mahal na Diyos. Kaipuhan itao ta ning bilog ang atong puso ta maabot ta maabot sa buhay ta na maki mahelak kita sa Kiya na borngon ang mga mai tana kayang darhon.

Ninto ka ano talaga daw ang pinaka epektibo na paagi para sa paghari ning sarugsod? Sabi ning iba ininit na lemon na inukagan ning asin. Ang iba man lawoy da ning cobra. Ikan man ga taram ihi da ning ilago. Anupaman ang sarugsod talagang pamation ka muna ning hapdos para ipa gilomdom sa ato na ang mga dwaging piga pasipara ta minsan iso yan matao sa ato ning hapdos para maghagad kita ning ayuda.

Bahi- is a volunteer in Africa.