Catanduanes Forum

Sa pokpok ako nagpa tatak. Summer man ninyon. Dili ko pa kutana pero dahil high school na ako mai maiwasan na guru-an. Yo mga kaklase ko puro sa hospital nagpa tatak. Kung ano-anong cut daa ang iga gibo dun pero ang pinaka popular yo iga sabing german cut. Kaya yo sado kung kaklase pirme kaming piga uyatan ning sophie da kami, siya da maurag ta german cut.

Pag sa pokpok ka nagpa tatak dapat may ninong ka na kagubay mo pero dapat bokong supot. Grabe pang piga otob na seremonyas bago tatakon pero ang importante boko kang takot sa labaha ta maski inanong otob kung sa oras ning pagpa tatak ma galungis ka, sa hospital ka na lang magpa tatak.

Ninyo bisperas bago kami tatakon iso man yo gabi na primero akong naka lagop ning sadong basong gin. Sado pang seremonyas bago magpa tatak dapat kaya mong mag lagop ning sadong basong gin ( baso ning blend 45 pa ninyon). Ata ta ga yayabos ngani kaming maka lagop ning sadong bilog ( si buryal sana yo naka gibo nyun). Boda ang pinaka murhi dapat magsakat ang kanos mo sa oro. Dintoyan nagpono yo paguro na boko man na primerong kupsit ang harayo ang lasik kundi yo murhi ang harayo ta winisik.

Ninyo ardaw na tatakon na kami nagpararigos muna kami sa dagat. Paka banraw diretso na kami dun sa baray ning para tatak. Asa luwas na siya ga ta-is ning labaha.Pagka kita sa amo medyo nag ngiwi lang. seryosong taho sa seryosong trabaho. Medyo nanguyompot ako pero ninyo makita ko yo gapas boda yo alcohol sa clutch bag, pigpasa Diyos ko na mai man mag tibanlas yo kiyang labaha. Sa Ising kami tinatak. Pag agi namo sa pagdoronan nangga pasi tor tukrangan pa kami kung sino yo maenot. Pag abot sa Ising yo primerong puno ning bayawas doon na kami tinatak. Nag otod na siya ning korteng L na sanga ning bayawas boda tinipyasan hanggang sa mag linig. Habang iga gibo nya toyan, kung ano anong paguro ang iga istorya nya ta nakikita siguro na nang lulumsi na kami. Maing duda ang bura sa kiya maestro ta sabi ning ibang tinatak na nya, yan hapdos da na mamate mo yo karag sana. Habang iga gibo nya to, pigapa supa-supa na kami ning dahon ning bayawas. Kaya ninyo hingunyon nya kung sino yo maenot, diretso ko nag itaas ning kamot. Sabi niya, ano lusi ka na? habang iga puknit nya yo baga na trapong bado. Sabi ko, iso na tabi. Nalusi yo ako ning su-oy sa iga dasi dasi-an ninyo mai pa ako batid maglangoy. Luhod! Ugsak na yo kiyang boses para paran maging alerto ka. Pag luhod ko sinuksok na nya sa kalo-kalo yo kahoy na aprad paran yo ibabaw para ma tindi yo panit ninyo ako. Pikit! Pok! hurat! Pok! Guimata! Pagkita ko sa ako bago ko binubu-an ning sadong baldeng malipot na tubig pagka kita ko na buhang na yo ako.. Pero tama yo taram nila baga man sana kagat ning hantik ta paka tapos nangimon na yo ako. Bayawas! Diretso ko tinipya yo iga supa ko sa kiyang kamot. Paka butang nya ninyo bayawas sa ako dinag-rian nya dagos ning gakod ninyo trapo. Yo nag sunod sa ako parehas man na dawhang pokpok Yo murhi kung barkada pag hingunya, lusi na yan? Mai pa yo simbag. Awww! sabay pangagaw. Oy ona pani gigisi-on ta yan! Mas lalong nag galungis yo barkada ko. Handaw! Luway luway na nag lani yo akong barkada. Ginhawa! Gumininhawa man. Agodoy! Pinaknit ni tiyo yo kiya. Ninyo mga oras na yoon nang lilipot na yo barkada ko. Luhod! Paka suksok, pok! Aduy! Mai ka maghiwas! Pok! Tapos na tabi? Iga kurog na hingunay ninyo akong barkada. Sado pa, pok! Iso na? nakalimot na magpasin tabi. Sado na lang, luway luway lamang tabi tiyo pakimahelak na ninyo akong barkada. Pok! ay agudoy! Sige luwa na! sabay gakod habang ga guro guro. Ay ano man na hiwas mo panong!

Pagparibod namo nanagbuan ko yo kaklase kong german cut. Tinarman kami, hayop! Tatak na! siin kamo? Sa hospital? sunod sunod na hingunay habang baga naka insulto yo goro. Kung sa hospital kami, aram ko na ang isimbag nya, mas maurag sya ta sya ang na enot. Pinakita ko na lang yo tambod kung trapo. Pagka kita nya, sabay hari, naka sukong habang iga kita yo kiya. Sa huna-huna daog ka. Sa pokpok! Sa pokpok! yo akong simbag. Ninyo mga oras na yoon, sa kahuray na panahon pinangamatis ko na yo akong kagrat.