Catanduanes Forum

PASYON
(Ay na ay!)

Si Tang Clemente para baker ning bote or ardaw ga libot sa banwa bogong ang sako ta ga hanap ning mababakar o mahahagad na bote. Siya ang litrato ning tahong gasakit dagmukan man o ardawan sa daran para man sa kiyang or ardaw na pagbuhay. Bilog na taon iso man toyan yan kiyang kolokasyon.

Pero pag – abot ning semana santa si Tang Clemente boko nang bogong ang sako kundi ga damrag sa pagbasa ning pasyon. Pabasa, pero sabi ning iba, sa–uro dato ning Tang Clemente. Ninyo magdongog ako sado beses sa kiya, doon ko nadongog kung painano nya pa-ukaon ang mga mensahe sa pasyon. Yan akong gilomdom baga sila mga sanganino sa likod ning aradab–adab ning karaba na haros mga boses na ga loygoy ning tupa. Anupa ta yo nagsunod kopot ko na yo salabat boda kape habang piga dongog yo sabi ning mga bata na Ay na Ay!

Ang semana santa sa amo hangop ning olor na iga parigos sa santos y santas, incenso, pinta, karaba, si-ngot ning dayo,gin boda langsi(ta puro isda ang isisida). Ang tunog ning semana santa sa amo tunog ning matraka, careta, martilyo, sirutso(pag gibo ning calvario), kagsing ning judeo, motor boda awto na ga libot sa kalbaryo, muda ni Sano boda ni Inoy (ta piga par sogotan ning mga bata), mga agik-ik ning mga daraga y soltero na nakakuha ning rason y tiempo, mga cantura na ga dasar sa prusisyon, generator para sa ilaw ning mga caro, mga bata na gamo-gamo sa pag gibo ning calvario boda mga wangi na ga basay basay sa tinampo. Ang isip ning mga taho sa amo naka sentro ki Kristo, si Kristo na pinili para mag–agi sa maing puknit na kasakitan para tuboson ang atong mga kasaran. Kaya gabos na pwerso para tawan ning bilog na pusong pag gilomdom piga tao namo. Pag pono sa pag krus, Istasyon, Palm Sunday, Lunes hanggang biernes santo, Dolor, pag sunog ning karayo, Siete palabras hanggang sa pag dòdò, gabos na prusisyon, Sabado y Gloria, black saturday hanggang sa pag tonton pag Easter Sunday naka mustra ang mga gawi-gawi na piga otob taon-taon. Maing kanigoan na ga tarabangan para sa sadong pagtubod na sundan ang mga kasakitan ni Kristo na iso yan daran, katotoohan boda buhay.

Ang pono ning prusisyon si Lamuerte na sa akong gilomdom turang na korteng taho na pinintahan ning puti boda matapos ki Sto Intierro na klarado pa sa akong isip na hinurid na bangkay ni Kristo na nasa caro na potos ning salming. Ang mga Santa y Santos piga alagaan ning kanya kanyang pamilya na piga pasa pasa sa kada miyembro yan pagpa- tapos. Ang mga Judeo boda mga disipulos may naka toka man na mga pamilya. Kuntodo uniporme pa yan mga Judeo boda mga disipulos. Ang mga anghel na matagbo sa pag tonton piga aragaw – agawan pa arog ning pag Santa Maria pag Pasko. Arog ninto yan pag sarig namo sa atong Kagurangnan boda sa kiyang mga leccion. Bokong arog ning prinsipyo na Marxist na nababakar, nadadaya boda nababanlihan o nalilimutan. Kaya dinto yan mas maliputok ang pagtubod kontra sa prinsipyo, ta ang pag tubod ning taho sa Diyos iso yan dadarhon niya na maing digta sa kiyang pag-daan. Bokong arog ning prinsipyo na pag na sukol ma suko. Kaya kung sino man na grupo yan ma porbar banlihon ang among mga gawi o ilisya kami sa impierno iso man yan ma sapor ning kanigoan na resistar y lastar, ta por dahil sa kilang mai pag garang sila magurang ning maing ginurangan. Kung ang mga ilaga ang diyos badil, panakot boda kwarta, kami masunog man ning karayo na ma dopdop sa kilang hilaw na prinsipyo. Kaya ninto pa sana mai ninyo digtaan ang mga prusisyon ning inyong baga mga anghel na mata ta sado yan na sagradong gawi ning among pag tubod. Gabos pati kami tipa tukis na.

Si Tang Clemente sa pasyon, si Avid sa Caretta ning Nazareno, Si Sano sa linya ning prusisyon. Ay na Ay! Mga pag-sakit! kaipuhan para sa pagsakat sa Langit!