Catanduanes Forum

PAROLA

Ang parola baga man sana maestro ning orchestra. Ang mga para pangilaw ang mga musikero habang ga lutaw lutaw alas dos ning maaaga. Kung kikitaon sa parting Hiyop mabubungog ka sa siram ning pagmasid habang iga hamoran ning bùnag ang pamoranon. Maing kasalida ang tunay maski pa giboon na sangribo ang piksel ning digital na camera. Maski inanong pagbago ning shutter boda lente o inano kaharangkaw ning optical na zoom, mai kayang ikaptyur ang orihinal. Siin ka makakita ning mga hasag na naki bayle sa mondò ning parabanwit. Siin ka makakita ning ga sinyaw na buran habang nangga burongagan ning silyab ang mga bitoon. Siin ka makakita ning burarakaw na baga na matogpo sa imong kimot. Siin ka makakita ning buran na baga na ga dilam ning tònog sa kabukidan. Gabos na too piga masdan ning parola. Baga mai makapaniwara sa gayon ning kiyang nakikita, kaya siguro kanayon yan pilok.

Ang kor kìbat na simbolo ning parola iso yan pagtabang na maing kabanli. Mahar man na bapor o baga dugnit na dinahit, mai nintoyan iga pili na tawan ning giya. Maski ngani baga na matraka ang tunog ning hagpos ning su-oy, ang parola baga pura na gahurat sa lapanit nintoyan. Parehas ning mga tahong maing kontrol sa pag kagsing, ang dagat pag nag lantap baga na sana to dinangdang na dahon ning saging. Kaya bokong gabos na bagay madadara sa pwersa o kagsing. Minsan maski mai tinaram nakatabang man. Iso to yan darang kugaok ning parola.

Sa atong pag usar ning parola, piga tawan ta man daw to ning magkakanigong atensyon. Bukod sa kaogmahan nya na kung minsan may nalilingong mga litratista, siguro minsan mag tiga kiling man kita sa gayon ning atong mga parola. Dahil kung tatanawon ta sana toyan na baga lungare na pirmeng namlaslayt, ona baga na kita to mga boar na iga gamit sana kung kaipuhan. Magiging preso kita ning pànos na pag iisip na puro sana gilok ang masiram.

Boko man sigurong maraot na sabihon na ang pag asenso ning sadong lugar mai espejo sa pag ataman boda pag gilomdom sa parola. Dahil ang parola pwedeng maging simbolo ning pagka sarado. Boko dapat na baga bòkon o kinis na nangga borotongan para maing makasabrit sa pang amak na ma opos sa atong mga kaluyahan.

Naturalmente mai man talaga maaabot ang tunay na pag lantap ning pagkabuhay, ta ang tunay na katoninongan mamati ta man sana sa kahadian ning Kagurangnan. Kung kita nag sunod, nagdasar, naggibo ning mga tataramon ning Kagurangnan iso na to ang matao ning maing katapusan na katoninongan. Pero kung magapar para kagsing man sana kita na maing magkakanigong pag gibo, madari kitang maging parola na maing ilaw, igalumot boda iga takotan ta iga istaran na ning aswang.