Catanduanes Forum

Ninyo abredo pa yo kampanaryo sa amo pirme kong piga sakat toyan. Tatlong bokong magkabaing na hagdanan ang sasakaton para maka abot dun. Pag naiisip ko ang kampanaryo mai pwedeng mai mo maisip yo para bagting. Si Antolin istrikto, pili magtaram baga man sana bagting na matunog sana kung kaipuhan. Kung minsan ga sawong sawong man si Aboy (yo orihinal na nagsurit ning toothpick pakatapos niyang gamiton) pero ibang istorya man yun, dakurong istorya. Mara ngani ta yo mga para basketball sa amo linawgaw ni Aboy. Paga ka alas sais pano maski neck and neck sabi ngani ang laban pag nag bagting na, gabos yan madasar ning angelus. Pinahuray huray ni aboy yo bagting. Nadugang yo paningot ni pako boda ni langaw kaya nawara yo momentum. Dinaog sila. Grabeng pusngak ni Aboy.

Pilang beses na pigsalidahan yo sistema ning pag bagting. Adyan na binugkosan ning pisi ta sabi daa komportable ta mai ka na masakat. Pero ang mai talaga kaya ning pisi ang pag repeke. Bokong gabos piga togotan giboon toyan. Seniority man kumbaga. Kung bago ka pa sanang sacristan, dun ka na muna sa pasado sado arog ning pagbura ning mga para simba boda yo iga sabing pang alas sais. Apeke man talaga na buraan tong repeke kung peki ang pagpa itok. May arte man ang pag gibo ninto, tyempuhan man. Pwede kang mabangguran sa oro kung sara ka sa tiyempo.

Sa sadong taon bihira man giboon yan pag repeke. Sa akong tandaan piga gibo sana to pag krismas boda holy week. Kaya bilog na taon na nakatayod sana to. Minsan iga tiga pakarag man to kung may remalasong sunog.

Iba-iba ang mutang ning kampanaryo, iba-iba ang gayon, iba-iba ang bagtingan. Nakisumaro man to sa mondo o kaogmahan ning mga ga bisita dinto. May mai sinuwerte na nakatado sa bagtingan kaya nauntog kung ano man iga isip na malaen. May mga gana sa iba-ibang bagay na pigahigop ang siram ning mate ning nasa itaas. May mga pangitorogan na nabubuo sa musika na dara ning bagting.

Kung atong paga wani – wanion, ang kampanaryo sadong lugar man na pahingaroan ning mga babanhod na mga plano, mga kasakitan boda kaogmahan. Sa mga nasakitan, kaipuhan magpagar o mag igot para maabot ang anggolo na makikita mo ang imong pinagaran. Sa mga puerte ang pagkabuhay, kahaharang man kung mai ka mababa sa anggolo na mapoporbaran ang tibay ning imong isog. Pero maski ahin kang anggolo nintoyan, kaipuhan mong magbaba sa anggolo na tingarog mo ang altar. Ta totoo ngani na sado man sana ang daran, kahustuhan boda buhay.

Ta cerado na ang kampanaryo sa amo, hahanap hanapon ko man ang hangos ning igalumot na binagong. Mai ko na mamamate ang lipot ning hangin dun. Eksklusibo na lang ki Antolin boda ki Aboy ang kampanaryo ta kinanaan na ning puertahan boda kandado. Pero sabi ni Aboy huraton lang da siya ta ipasubri nya yo llave. Kaya lang nasa Gigmoto ata siya, huray pa bago makaabot ta hahapitan pa niya gabos na parokya. Sabi ngani ni Aboy ang paghurat ang premyo pagsakat.

Nintoyan masiram man paran kitaon ang kampanaryo sa anggolo na piga tingarog.