Catanduanes Forum

Si Anday na Taga-Calolbon (San Andres)
a.k.a. ROSELIN GUERRERO BACAY – 17 anyos

Si Anday na taga-Calolbon, edad 17 anyos, nakaistar sa sitio New York sa barangay nin Mayngaway sa munisipyo nin San Andres, pinakamatuang aki nina Rolly Bacay asin Jocelyn Guerrero. An saiyang ama sarong ordinaryong parasira, parauma kun panahon nin pagtanum/ani, asin laborer kun igwa nin mga nagpapatugdok nin harong sa palibot nin barangay. An saiya man na ina iyo an nawawalat asin nag-aasikaso sa harong asin sa bilog na pamilya.

Sa edad na 17 anyos medyo atrasdado na siya bilang sarong 3rd year high school student sa Mayngaway National High School alagad padagos an saiyang paghinguha na makatapos nin pag-adal. Katunayan kan saiyang pagpursige iyo an makabali sa Honor Roll kan nakaaging taon kan matapos niya an 2nd year sa secondary, pinatotoohan ini kan Principal kan Mayngaway National Hign School na si Mr. Domingo S. San Juan.

An saiyang ama na si Rolly Bacay, 39 anyos, nakatapos man nin elementary, alagad an saiyang ina na si Jocelyn nakatapos sana nin grade six sa elementary. An mga tugang ni Anday na taga-Calolbon iyo an minasunod: Ronald (15 anyos) nakatapos sana nin 1st year high school asin ngunyan nagtatabang na sa saiyang ama para makadagdag sa pan-urualdaw na pangangaipo nin pamilya; Rosalie (14 anyos) nasa grade six sa elementary; Ronnie (11 anyos) grade four sa elementary; Jonel (10 anyos) grade two; John Mark (3 anyos); asin Richard (4 bgulan pa sana).

Apesar sa rekomendasyon kan principal kan Mayngaway National High School, rekomendado man si Anday na taga-Calolbon kan OIC Social Worker Officer na si Mrs. Francisca Lucero kan San Andres, asin kan Punong –Barangay kan Mayngaway.

Sa intrevista kan saindong lingcod, inako kan ina ni Anday na taga-Calolbon na kakulangan sa pagbuhay an mayor na rason kun ngata napapabayaan kan saiyang mga kaakian an pag-adal maski na ngani sa elementary na kunsideradong libre an pagpa-adal sagot kan gobyerno.

Ipinaliwanag pa kaini na napipilitan na ngani magtrabaho an iba nyang aki makatabang sana sa pangangaipo kan bilog na pamilya. Alagad dakula an saiyang paglaum sa kay Anday na taga-Calolbon dahil sa nahihiling niyang pagpursige kaini sa pag-adal.

Segun sa ina, pangaturugan ni Anday na taga-Calolbon na makatapos nin maski anuman na kurso sa kolehiyo tanganing makatabang bako sanang sa saindang pamilya kundi maging sa mga kaparehas nindang nangangaipo sa saindang baryo.