Catanduanes Forum

HILAMON

Bago ta namitan ang siram ning humay, kaipuhan sigurong magpasalamat kita sa Mahal na Diyos boda sa mga para oma na pagar boda singot ang tinao bago maging pang sabwag, pantiprak, pantagdok ang binhi, bago maging anihon ang tinagdok o tiniprak, bago ang anihon maging paray, bago maging upa o dimrod ang paray, bago maging bagas ang paray, bago maging minolino ang paray, bago maging binabayo ang paray, bago maging mumho ang humay, bago maging duhay ang humay.

Isipon ta siguro na ang pagbarik barik ning mga para oma para mag hilamon, magkamrot, mag arado, mag ani, mag goron baga man sana pagtios na ga taribong sa kilang pagbuhay. Isipon ta siguro na sa kada pag siyesta may mga abaga boda pi-ad na nangga bagor na sa ka liliyad. Bentingon man yan salapion o sadong sagop sa tanaw ko man sana toyan, kurang ang kita nila sa pagar ning pag oma. Kaya dakuro ang pasalamat ta dapat sa mga para oma kung tayon ta naka namit pa kita ning lugaw, buhaghag, matugas o orayog na luto boda mga tinuktok na balisongsong, suman, pinoronan o ibos.

Grabe ang trabaho sa oma. Pag pono sa pagpreparar hanggang sa pag burad boda sa pag bogong ning sisenta kilos na paray sa mahanglas na pagdoronan, pag goron, pag ani, pag hilamon, pag bayo, pag hurat sa pag molino hanggang sa pagtahop boda sa pag hingmay ning pasi. Pero boko man na gabos masakit, pag karaunan na lintian maski balaw o sardinas sana yan itsura ning jollibee ta dito unlimited ang humay. Ang hangop paran ning singot, balaw, sardinas boda lupak nakapa gana sa pagkaon.

Pag tinagkos na ni among yan kiyang minasbad mai na kami maka reklamo kung tipa sinyaw pa kami ning sirikyudan, basketball o baseball. Ta arog sa giyera gabos na oras importante. Pagsakay namo sa karbaw doon mo mamate ang kusog na iga sandalan mo iso yan imong ama na arog sa karbaw kung magtrabaho talagang kinarbaw. Bago magtrabaho kaipuhan palabugon muna ang karbaw boda painumon sa sarog. Pag dukot ning siki ko sa lupak sa oma dun mo mamate ang lipot ning bokong pag sadili. Madyag ngani sa beinte anyos na pabor bantay ni among ning oma gabos kami nakatapos ning pag adar. Ninto nabakar na namo yo kiyang dating iga bantayan. Sa maghapon na pag oma oranan man o ardawan maka tigmok ka na pahingurag o bokong hayo-hayo ang kaipuhan mong kusog para maka dagos ka hanggang hapon. Kung maluya luya ka maga dayoyo ka sa hapdos ning ginhawa pagkaaga. Kung inano ka seryoso ning hawong ni among iso man yo pagka kuntento ninto pag paribod namo. Habang iga limpyahan ni among yo kiyang malupak na piko boda tabak, sa putot kung isip isinumpa ko na ako yan magibo ning paagi para matapos na yan or ardaw na paglimpya nya ning lupak Pero mas posog paran yo pagkamoot ninyo sado kung pogto ta siya yo nakatao ning paaging too sa kita nya sa abroad.

Ang buhay baga man sana pagtinaman. Ma arado, ma tinaman, madasar na mag uran, mahilamon, ma ani, ma kaon, mapahingaro. Ta kung maski baga ka todo, semental o terniro ka kusog pero gapar pang hagad ka maabot ang oras ma mukrat ang mata mo sa gursok. Lalo na kung yan pag hagad may patakot na badil.

Hanggang may awot, may hihilamonon. Hanggang may ga isip na may kwarta sa bagas, may mahihilamon. Hanggang ang gabos gusto magkaon ning humay, may ma sakit magtinaman boda may ma igot para makabakar nintoyan. Hanggang may pobre may mga pangitorogan na mapapasa kamot sa pag igot.

Daog ning higos ang gursok. Mabuhay ang humay!