Catanduanes Forum

SHOUT OUT / SHOUT!! ... o "Kurahaw" sa panaramon nin mga taga sur /"kagsing" man sa norte, iyo an pag buhi' o pag pakawala kan piga dikta nin arimantak sa paagi nin naka kalag na tunog na mina luwas sa sihong...

Sa ngonyan na modernong panahon, gamit an modernong gaheto, 'pag nag shout out ka sa parteng ilaya...mina dagundong bako sanang sa paribot nin asia, gilid nin australia, o singit nin africa...kundi pati sa dulo nin america na mina daging(echo) sa paribot nin europa. Sabi ngani nin mga para uma - haytik na an panahon ngonyan ta igwa na nin fv este facebook! (sabay tiphay nin mam-on...PWEE!!)

Para ma prubitsaran ko kung talagang totoo an tsismis na minakuriyat sa bingo'-han nila Nang Bebang, sociudad nila Tang Idong, buda hagotan ni Pay David...ginibo kung laug-gon dangan duriduton an magilok asin nakabungog na kinab-an sa ibabaw nin facebook. Duman ko nareparo an manlain-lain na shoutout na akma sa kung sisay an siyang mina pabuhi'... Igwa nin mga ugaling kulot, hunat... mga sihong na mahanlas, malagkot... ugaling bumbero na napakalma man nin mga ugaling albularyo. Manlain-lain an tabas nin sihong na mina depende an tunog sa lugar na namugtakan,sukol nin ginhawa,kolor nin iyok,buda kamugtakan sa buhay.

Sa sakuyang prumerong arangkada, sinil-ip ko muna an mga ka batch ko kan elementarya. Su mga tropa kong butisaon(kan panahon,na mas bantog sa apod na bolgor gang) mina shoutout na nin mga istoryang gyera y pag rikay habang pigapauranan nin granada. Su mga babaye man na mala maria clara, mina shoutout man nin proud sya/sinda sa(dai na mababa' sa) lima nyang karga-kargang haka', mga brand nin abrasa este gatas, diaper... dangan shoutout sa mga istoryang gamay nya na an magbaton nin kalson nin haka' siring man sa pag huros kan sa agom. kadaklan man sa mga lamawon na dai pa nin agom iyo an mga shout na- "dai ako nangiturog!..siguro tinago' mo su katri' ko ano?" ; mga shoutout manungod sa saindang pag-date sa "breakwater" ,"tulay","kampanaryo", asin window shop sa "itaas nin saud". Su iba man na mala aktibista... busy man sa shoutout na "grabi na an gutom na Pilipino!"; "Hunger strike!" ; "1month na akong diet ta dai na ako nakahusto sa tamong".(Kaniguan! may pa high poverty rate pang aram... figure conscious man sana paran an loko!)

Mas minahamis an diskusyon 'pag an shoutout manungod na sa "reunion"...syempre kanya-kanyang ungkat na nin mga litratong muta'on...recognition,graduation, 1st communion,etc... adyan na
an mga tatsaran nin ginhawa buda hitsura. Pasaradayan nin puson, pahalabaan nin riog, pagarayunan nin ngilit, na ku-kumparahon man sa presenteng panahon...shoutout sa mga tang-ga' tang-gang puson, haranapan nin riog, padarakulan nin tingo sa pustiso, asin mga abs na buminagsak.

Su mga ka tropa kong mahilig (kaidtong) makitandanan sa patapos, asin padasar... sa ngonyan, iyo na man an mga bida sa simbahan. Pastor na man su ibang ex-makasar-anan... kaya kadaklan sa mga shoutout ninda iyo an "banal na tataramon nin kagurangnan(bako' su mga gurang sa elderly home)".

Ikaduwa kung sabak, hinanap ko su' mga shoutout kan hayskol batch kung mga maurag, makulit, palpak, buda su (pigasabi nin mga gurang na) mapalad? [halat ka! pag tinaram na "mapalad", an boot sabihon kaya kaiyan,dakul an palad?...sana tubu'an pa ako nin palad, para parehas ninda maging mapalad man ako.hehe(Bathala.joke lang po! hari pag gibuhi ta ku-kulangon kami nin kubyertos sa halong)... Balik kita sa paghanap nin mga hayskol batch kong sihungan.Naka-abot ako nin Macau,Paris,San Miguel,Dubai,Russia, Gapan,Sudan,Alabang,NewYork,Saudi,Sidney... Manlain-lain na klima, manlain-lain man na shoutout an tirada. Su mga gabatad sa disierto mina shout nin-"baha' na sa dubai", "gauran nin yelo sa lugar nin mga arabo". Su mga nasa canada buda america mina shoutout man nin "grabi an init sa kwarto! ga bagyo pan-o nin yelo !" ; "ibalik nyo ako sa pinas!..miss ko na an yelo,monggo',sago'!...naka miss an halo-halo". Su mga nagparka lamos/butod man sa tamaw kan panahon nin "el bimbo" iyo man su mga daing permanenteng piga ilukan, ta an kadaklan, nasa Lawod nin Pasipiko, Arctic,Indian,Atlantic,Southern & Taguntong pt.Naging marino. Kadaklan man nindang shout puros countdown sa pag du'on este du'ong sa pantalan'; Pagkalapo' asin pagka wawoy nin to'o/ walang kamot; asin pung-aw sa libingan ng mga bayani!

Sa pangtulo kong kambio... pinurbaran kong maki usyuso sa shoutout nin mga politiko.Syempre su' bakong mga pabor...mina SHOUT kan saindang ribong nin payo, samantalang umaw man an shout kan ibang natandanan. Manlain-lain an shoutout na kalain kun sa pag-abot nin panahon mababasa nin satuyang mga makuapo sa librong Araling Panlipunan y Heyograpiya Kasaysayan at Sibika. Mga shoutout manungod sa pagpadakula nin pimples este susu ni presidente GMA . Saro' pa an mga shout sa "Noynoy&Nognog" tandem... na ma susurat sa kasaysayan ang pagka igwa 'ta nin 1st black vice president.

Sa ultimo kung maan, hinanap ko an marinas kaining epekto... sakuyang nareparu na sa pangharyaw, dakula paran ining pakinabang... Trangkilo nang mayad asin pabor sa mga bur-ad, ta sa paagi nin shoutout maipa-abot na an saindang gustong ipasabot...mga shout na "memorial lot for sale!" ; "Solar energy light bulb for sale!";"baratu na an kilo nin durado";. Bako' sanang sa pangharyaw nin costumer ang shoutout epektibo, kundi pati na sa pagharyaw y paghanap sa agom este agomon.Sa paagi nin shoutout nabubuhian an gustong ipa abot na dai minaluwas sa kimot. Nareparo kong malibok man paran sa shout an pura(pipi), klarado man paran an panimbagon o komento nin mga bungog. Nagigilumduman ko pati an mga panaramon kaidto kang tigbak ko ng lolo... na "mas matarom an letra kaysa bag-ong tais na labaha"...huwaw! kahararom mo pay!dai ko ma dig ang saimong shit!...sugot lang pay! hari pag pinutong sako' kung ajan ka man sa porgatoryo ta himunan kaiyan mahulog ka lugod sa impierno...(signOfTheCrossX3_+++)

Parehas nin mga urumpukan sa mam-onan,pantaw na pigakuto-han, tuba na pigaharampangan... an shoutout sa facebook na pigakagaramuhan...sa komunidad, dakula man palan an pakinabang. Sa paagi kaiyan, satuyang naa-araman an kagustuhan o habo nin kadaklan. Naga kaigwa nin kontribusyon an mga suplon sa paghayag nin saindang mga pigatagong opinyon! Dangan dai naman nakakarag an shout kan kimutan sa banwaan.

Saro' kung nasusudan na karahayan kaining kurahawan
Iyo an pakisumaro asin panindugan nin kadaklan. An daing takot na paghayag kan saindang kagustuhan. Para mas maipahiling sa bilog na kinab-an ang kagayunan kan saiyang inagihan siring man sa lawak pa nin saiyang pupuntahan, na dinikta sainya nin puso asin isipan sa paagi kaining kurahawan...
-end-

==============
[ SHOUT OUT: Utter a sudden loud cry

Classified under:
Verbs of telling, asking, ordering, singing

Synonyms:
cry; scream; yell; shout out; shout; holler; squall; hollo; call
(http://www.audioenglish.net/dictionary/shout_out.htm )

=============
SHOUT OUT: a brief expression of greeting or praise given especially on a broadcast or audio recording
(merriam-webster Dictionary)