Catanduanes Forum

“KAMONG DUWA AN BUHAY KO”
(Soneto kan Ama sa saiyang Agom asin Solong Aki)
Ni: John Torres

Kamong duwa an tamang dahilan kan pagkabuhay sa kina’ban;
Ihihinghing kan sinsirong puso pagkamoot na daing katapusan;
An aldaw man mapara asin dai na magsidlang duman sa silangan;
Liputok na soneto kan puso sa diklom maski nuarin dai magagadan.

Rinunot nin husto an sakong puso kan ako maghale sa satong isla;
Punyal na nagtaros sa daghan an luhang gikan sa saindong mata;
Kapung-awan titioson para mata’-wan nin simpleng buhay an familia;
Sa pangakong dai na mapa-oripon sa sadiling banwang daing hustisya.

Gayon nin burak ano an halaga kun manga kahimanwa padagos na naaapi?
Kun an paghibi nin anghel nadadangog, mangaturog ka pa daw kun banggi?
Lideres minayaman alagad an manga tawo gutom, an kadaklan manga pobre;
Pina-orog an korapsiyon pero an katalingkasan pangaturugan na sana pirmi.

Pagsabot an hagad ko kun dai nindo ako kataed sa paghampang sa bagyo;
Sa kalamidad nin buhay dai ko kamo nakukugos dahel ako harayo sa saindo;
Sa saindong pag-agrangay dobleng padusa an namamate kan sakuyang puso;
Duman sa tahaw nin kadlagan hahanapon an pangako asin regalong paraiso.

Kun sa satuyang isla sa pangunudon sana natatan-aw an matoninong na langit;
Kun sa manga inosenteng mata nin querubin naheheling daing sukol na pasakit;
Kun an dormido na sana an nasusupog sa kara’-tan nin manga pulitikong midbid;
Sisay pa kayang Ama an matugot na an saiyang aki mag-inom nin mapait na tubig?

An pagpasiring sa harayong lugar senyal kan sakuyang pagkamoot na dalisay;
Pansadiling kaogmahan tinalikdan, maski an aba kong buhay handang idusay;
Kamong duwa an solamenteng inspirasyon kan sakong padagos na paglakaw;
An puso nindo asin puso ko pinag-saro, bugkos sa pagtan-aw sa bag-ong aldaw!