Catanduanes Forum

“AGRANGAY NIN KATANDUNGAN”

Ni: John Torres

Ano an dahelan sa pag-angray kan manga aqui?
Bako daw sinda gutom asin makulog an pagmate?
Ngata si Inang-Katandungan ngonian naghihibi?
Mayaman pero dukha, leog ligot nin maating pisi!

Winasiwas nin labis na pagtios an islang paraiso,
An pagkaburunyog linampog nin manga pulitiko,
Pati deposito nin “coal” sa Caramoran asin Payo,
Hahab-ason nin manga lideres pati kan Monte Oro!

Makapa-layog pa kaya nin buradol satong kabataan,
Kun an lawas sarom na sa korapsiyon asin kara’tan?
Sisay pa kaya an mahaw-as sa banwang nasasakitan,
Kun an futuro pigpabakal na ki satanas na sungayan?

Dakulang kasusup-gan hinampang nin Katandungan,
Padabang-aqui sa kamara oripon na nin kapasluan?
Kugos asin kabayle manga demonyo sa Malakanyang?
Prinsipyo haen na, ngata sadiling isla piglulupigan?

Impierno marhay pa kumpara sa gobyernong abusado,
Duman an manga disipulo ni Satanas nagpapaka-totoo;
Sa satong isla an manga suwail ga-astang santo-santito,
Sa paghab-as gamit an maskara ni Batman asin ni Zorro!

Hapiyapon lamang nagtitios na daghan nin banwa,
Pahidon an luhang minabulos saiyang manga mata,
Silyaban an satuyang puso; dangogon an konsensya,
Hurnuhon an maso ; labanan an abusadong puwersa