Catanduanes Forum

Ang Pagsapribado Kan EBMC

Dakulang isyu ngonian ining lakdang na gibuhon daang pribado o negosyo ang pagpadalagan kan EBMC. Ini sarong isyu na maka-apektar sa gabos na taga Catanduanes. Mala ngani ta nagka-igwa naman nin public hearings manongod kaini. Pero sa public hearing dai ka makakua ning tunay asin malinaw na kasimbagan sa mga critical na kahapotan manongod sa isyung ini. Pormalidad lang kung baga. Kaya ining surat na ini, ginibo ko.

Primero, sirisay ang mga tawo nasa likod kan lakdang na ini? Ang mga PBM na nasa printera, dai man ning pakasabot sa hospital administration kaya malamang na bako man sinda ang talagang kag-isip kaini. May mga anino sa likod ninda na nagmamanipular kang mga dapat gibuhon. Pwedeng mag itaas nin kamot ang mga tawong ini? Para maaraman nin publico kun ano man an saindang mga kuwalipikasyon para magka-igwa nin kaisipan na isapribado o gibuhon na negosyo ang pagpadalagan kan EBMC.

Kumplikado ang pagpadalagan nin sarong pribadong hospital. Dakul ang kaipuhan asin kuwalipikasyon para maging mad-ayad ang sarong pribadong hospital. Tibaad ang namatidan kan mga tawong nasa likod kaini nakua sana sa “Lakbay Aral”? Bako daw? Sa ngonian, sisay diyan sa EBMC ang tapos lamang nin Masters in Hospital Administration? Importante na maaraman ini ning publico tangani na maaraman man kun saen nagkua ning ambisyon ang mga tawong ini o kaya kun may competence man talaga sinda para magtao kita ning kumpiyansa sainda.

Kun ang babasehan sana ang presenteng padalagan kan EBMC, palpak ng masasabi. Magayon sa ibaba, baralangado sa itaas. Bagong refurbished ang ibaba, sa itaas may mga pasyente na nasa pasilyo. Sa pinagayon na layout sa baba, su emergency room, binalyo pa sa puro, ang agi sa gilid bako sa atubangan asin madiklum pag bangi. Dakul ng pasyente ang nalaog oya. Papunta pang morgue ang agi. Ang naheling ko na emergency room sa mga toltol na hospital, sa printera mismo, accessible tolos sa mga pasyente na kaipo ora mismo ang atensyon.

Maski bakong pribado ang hospital, pwede man maging mayad ang padalagan. Kan panahon na si Dr. Rudy Tresvalles ang hepe sa EBMC, maray ang pasistema. May mga iba pa man seguro na naging hepe sa EBMC na maray man ang padalagan. Sa ngonian, dai ngani daa palan pigkonsulta su mga doctor diyan sa EBMC manongod kan planong pagsa-pribado kaini.

Ang primerong maging epekto ning pribado o negosyong padalagan kan EBMC iyo siyempre ang pag itaas ning mga bayadan sa mga serbisyo kaini. Igwa kita ning magkapirang pribadong hospital oya na ang sabi maray man ang serbisyo, naayad talaga ang mga pasyente maski medyo masakit ang helang, pero nagagadan pag naheling na ang bayadan. Bako daw na iyo man ini ang mangyari sa EBMC?

Otrohon ko tabi, dapat maaraman nin tawo kun sirisay ang mga tawong nasa likod kan lakdang na ini. Mga kuwalipikadong tawo ba sinda? May ginibo ba sinda na Feasibility Study kaini? May Minutes of Meetings ba sinda na ika-presentar asin pwedeng ripasohon kun magharapotan kun pano ninda naisipan asin naabot ang desisyon na gibuhon ng negosyo ang padalagan kan EBMC?

Dapat aram kan publico kun sirisay ang babasolon ninda pag nakadagos asin naging palpak ang lakdang na ini.

Concerned Citizen

Note: Hinubon man ining surat na ini duman sa vulcanizan ko nin sarong babaye ta an sabi dai na daa sya naakumudar duman sa isinagibong public hearing. Pakihuron daa kan babaye na kun pwede man daa madangug an saiyang inagrangay. Apudon na sana daa sya bilang "concerned citizen".

Magayon man na madangug an arug kaining inagrangay ta an kadaklan na nadadangug sa ngonyan sa mga radyo sa isla, lalo na itong mga pigpa-padaba nin mga pulitiko, puros sana karahayan kan nasambit na lakdan sa sangguniang panlalawigan.