Catanduanes Forum

REPOST: HURING-HUDING

Para sa manga dati nang Nagtukaw (sa kangkongan) na Pulitiko:

(Pasabot: Kun aram mo na nagsierbe ka talaga sa tawo nin odok sa boot, an surat na ini bakong para saimo. Alagad kun aram mo na naghab-as ka sa fondo nin gobierno asin pinabayaan mo an saimong kahimanwa kan ika nagtutukaw pa sa kahadean, por dios y por santo, ini talaga dedikado para sa arog mong daing supog!)

Enot sa gabos, resibiha mun-a an sakong wala-toong PWEEE! para saimo.

Ano man an naglaog sa saimong arimantak ta grabe man an saimong pagdesidir na magdalagan otro sa maabot na pirilian? Dai ka lamang natamoy? Dai na kaipuhan na magdalagan ka otro ta sayang sana an pagal mo, siring man dai nungka kami ma-suporta sa latsyada mo. Nanamitan na niamo an pagtios sa irarom kan saimong maating kamot. Na-eksperyensyahan na nin banwa an saimong kabubuwaan. Kun ika pa, o arog man saimo an masunod na lider kan banwa, talagang ang mga taga-Catanduanes matitigbak na mukrat an marsok. Mas mayad pa, punta ka sa Bigaa Stadium (Araojo) paramas patambudan ta ka duman. Siento y siguro, dakul nin mapago nin taya saimo ta aram nin tawo na llamado ka por sobre dai madurot an tarom nin bulang ta sobra ang hib-og nin saimong kublit. PWEEE!

Sabi mo kaidto, bag-ong pulitika an dadarhon mo sa samong manga nagtitirilios. Panuga mo, tataw-an mo nin atensiyon an karahayan nin manga Katandunganon. Pero haen man? Nagpabutog ka baga kan saimong tulak asin bulsa. Su pondo para sa intereses kan tawo, pigpasarumsom mo baga. Butisaon ka na pati sa sobrang paghab-as sa kwarta nin banwa. Dai ka lamang nakokonsensya y nasusupog sa saimong manga gawe-gawe? Agudoy, kun arog saimo an ipapaon sa banwit, isusuka ka siguro maski nin gutom na pating ta dai kayang runuton nin saiyang matarom na tingo an sobrang hib-og mong kublit. Maurag ka sana sa diskursong panu’ nin kautikan, pero wara ka man nagginibo para sa samuyang karahayan kan ika nagpapasiram-siram sa pwesto! Servidor baga kamo nin banwa, ngata kamo ang pigsi-sierbihan? Dakula an an sweldo asin lampas tawo pa an pigre-resibeng SOP. Ka-usmakan! Bwaarrrrkkk!

Sige makisagumok ka sana sa eleksiyon 2010. Maki-bungagan ka nin udo. Kun sabagay, udo ka man sana sa panheling ko. Udo na pigbaduan pero an hasnut ga-arisngaw maski saen ka magpunta. Kun sabagay, sanay na kami sa imong karabyaduhan. Maski ano pang-maskara an gamiton mong panagbong sa saimong pandok, bistado na niamo an saimong karakas. Mag-asta anghel ka na naman sa entablado, magbinuot-buotan tanganing su magkapilang tawo na dai nag-iisip madara na naman nin saimong paoro-otrong manga panuga. Sa pag-atid-atid ko, ika su anghel na pigtakwil sa paraiso. Mister horrorable an unabi ko saimo, tabi man parinasi an pagsul-ot mo nin pantalon habang naglilibot sa pangampanya ta tibaad biglang maglasbot sa saimong sarwal an kolor pula mong ukig. Dai ako ga-singhot nin rugby para maghalusinar na ika an “salvador” kan banwa. Siring man, dai ako gatumar nin kalampinay na nawaawara sa wisyo paramas suportahan ka. Ano ako bua na maniwara sa katarantaduhan mo??? Pwak!!!

Segun sa usipon ni baklitang si Ading, ginibuhan mo palan nin paanos para makalastar sa saimong manga kritiko asin manga kalaban sa pulitika an sagradong okasyon kun saen dapat nag oogma asin nagse-selebrar an lambang kristiyano asin tawo. Kaati Nonoy nin ugali mo. Abnormal ka. Pagano kang gasagin-sagin na maka-Diyos! Santigwaron ka talaga! Mayad saimo latiguhon nin sagay tanganing mamatean mo an gilok asin lanit nin kapasluan mo! Pwee!

Sala mananggid an saimong paghona kun pig-iisip mong tulalong kaming mga pobre. Nonoy, batid na kaming mag-gingin sa manga sitwasyunes ngonian. Pasiram-siram ka bagang pirmi ta bagi ka sanang galag-ok nin miswa sa pagsurop mo sa kwarta nin banwa. Mabalos ta por dahel saimo, naaraman niamo na an kadaklan sa manga arog mong pulitiko anas switik asin bubuwaon. Ano an hona mo, masasaruan mo pa kami otro??? Hak! Hak! Hak!

An minagalang,
Kag. Diospano “Tang Panoy” Santiago
Dating igwa nin Kolum sa Catanduanes Chronicle