Catanduanes Forum

REPOST: HURING-HUDING

Para sa manga Bag-ong Kandidato
(Pangnasyonal asin Pamprobinsyang Posisyon)

Marhay na aldaw sa saimo!

Harani an eleksiyon. Aram ko na saro ka sa manga indibidwal na minahagad nin samuyang suporta asin boto. Nadangog ko mananggad an saimong mga litanya sa entablado na suboot hahaw-ason an satong banwa sa labi-labing pagtios dara nin kurapsiyon asin pag-abuso nin manga dating asa poder. Marinas an saimong mga patara-tara manungod sa manga proyekto asin programa na suboot saimong ipapa-implentar kun ika tataw-an nin oportunidad na makatukaw sa posisyon. Magayon sa talinga an saimong mga naunambitan. Pero halat ka, bako daw saro ka man na demonyong minaastang anghel sa entablado? Pasensiya ka na kun sa heling ko sungayan ka man ta an saimong manga tataramon niliw-as man na kan manga naka-aging pulitiko. Baging daog pa an “long-playing” na plakang paoro-otrong pigtataram sa nagtitirilios na kahimanwa. Halatadong praktisado ka nin husto sa bugawas nin saimong kabubuwaan. Bako man hale sa puso, kundi sarong memoryadong mensaheng sinurat kan saimong binayadan na “speech writers”. Pwee!

Sabi mo dai akuon an perak na pigtatao nin mga TRAPO. Pigbabalangibog mo pa na dai ka nungka manaltag nin kwarta ta dai mo babakalon an boto kan manga tawo. Helingon ta, baad surupon mo an saimong sadiring riwoy. Hak! Hak! Hak!

Awat nang haloy an manga prosupwestong proyekto para magkai-igwa kita nin “cold- storage”, marhay na farm-to-market roads, magayon na pasilidad sa mga eskwelahan, tuwang sa manga para-sila, para-bandala/para-hag-ot asin iba bang manga proyektos na makakapa-irahay sa buhay kan mga nagtitios asin malnuris na namamanwaan. Anom, pila na bagang eleksiyon an nag-agui? Imbes na kaginhawahan, mas nagruro’ an kamugtakan kan mga dati ng pobre, alagad su manga daing supog na pulitiko lalong nagdakul an pagrugaring. Lasbut na lamang an bungaw ni Pading Tacio pero an manga pangakong ini dai man narereyalisar. Pagnaka-tukaw na sa kongreso y kapitolyo lingaw na an gabos. Pweeeee! Asin saro pang Pweee saindo gabos!

Helak man kitang manga pobre. Pirmi na sanang pigpapangakuan kan manga pulitikong ini. Siring man, despensa an hagad ko sa manga matanos asin totoong personang liputok an pagmaw-ot na makatuwang sa samo. Kami minaasa na dai kamo masuway sa saindong manga masisiram na panuga sa samo. Isipon nindo na mantang naglilitanya kamo sa entablado, kami aduman sa saindong atubangan sa pagdangog sa saindong darang suboot na bag-ong pag-asa mientras sa nagtataralsikan sa samong pandok an saindong mahasnut na riwoy. Atiti!

Prubetsari na lokohon mo kami ta rarapasun ta ka nin ukig nin orig. Ngonian pa??? Baad mamatean mo an samuyang uyam. Gigilyeton mi an saimong hibot-hibutan asin kakariguson ka niamo nin argwadienteng-suka na pinahubagan nin siling-labuyo. Kun paa-asahon mo kami sa saimong manga daing kamugtakan na panuga, dai kami maduwa-duwang tuhugon nin gihoy an saimong lasbutan. He! He! he! He!

An minagalang,
Kag. Diospano “Tang Panoy” Santiago
Dating igwa nin Kolum sa Catanduanes Chronicle