Catanduanes Forum

Ini sarong surat nin "concerned citizen" na hinubon na naman sa sakuyang vulcanizan:

Sala na Pagsingil nin Parking Fee sa Airport

Anong klaseng pasistema igwa diyan sa Virac Airport manongod sa pagsingil nin parking fee? Ang gasingil palan diyan mga tricycle drivers o grupo nin mga tricycle drivers? Pano nangyari na nagkaigwa nin poder diyan ang mga ordinaryong tricycle driver mantang propriedades nin gobyerno ang parking area diyan?
Kung totoo ang argumento na ang parking area diyan sa Virac Airport pig donar na sa CAAP asin igwa talaga sinda ning reglamento manongod sa pagsingil nin parking fee, dapat empleyado ning CAAP ang magasingil bako mga tricycle drivers. Irregular na transaksyon na mag deputize kamo ning tricycle drivers o kaya sisay man na pribadong grupo para gibuhon na parasingil ninyo. Helinga nindo ta paghinapot su mga kulang na pakasabot na mga tricycle drivers kun ngata ta gasingil sinda, gakuam-kuam kun ano ang isimbag. Ngata, kun may mawara na gamit sa mga sasakyan na nakaparking diyan o ano man na remalaso, may pananagutan ba o kaya ba ining panagutan kan mga tricycle driver na parasingil nindo? Sisay na logod ang may accountability ngonian kun siring ang mangyari?
Sa airport, halangkaw na kalidad ning serbisyo ang piga laoman nin mga tawo ta ang pagsakay sa eroplano bakong basta. Pagkatapos ang gigibohon sana nindong mga poderoso diyan su mga tricycle drivers? Kung ang gasingil nin parking fee diyan sa airport mismong empleyado nin CAAP, naka uniporme, sa heling ko kulang man ang mareklamo diyan.
Pero, ang piga sabi kong ini, kung tama ngani na magsingil kamo diyan nin parking fee. Kun totoo na pig donar na talaga iyan sa CAAP, gusting sabihon, bako kamo ang nagpagibo kang parking area na iyan. Ang hapot ngonian, ta iyan dating tinampo, sisay ang nagdonar sainyo kaiyan buda poon ba na pig donar iyan sainyo, guminastos na ba kamo sa maintenance kaiyan? Kun bako man kamo ang ga gastos sa maintenance, dai kamo dapat magsingil para diyan.
Mataram pa su parasingil ninyo diyan na bakin man ang PPA ta gasingil nin parking fee sa pier; talagang maluya man ang sabot. Dai tabi gasingil nig parking fee ang PPA pwera kun overnight ka na magarahe duman sa pier. Ang pagsingil ninda, may tamang resibo buda gabos na sasakyan, sa gobyerno o sa pribado, sa politico o bako, piga singil. Ikaduwa, ang pier, PPA mismo ang naningil bako tricycle driver o estibidor. Ikatolo ang PPA, ang saindang ahensiya ang mismong ga gastos y ga mantenir kan pier. Bako DPWH, bako gobyerno probinsiyal o munisipal.
Kamo diyan sa airport, gapili kamo ning piga singil. Pag sa gobyerno o politico daing taripa. Pag naheling ninyo na magayon ang sasakyan, dai ninyo pigasingil ta seguro nabalukagan kamo. Ano ng sistema ninyo an? Nagkahang pa kamo ning kurit para sa Press. Ngata ta libre man ang Press?
Iyan sanang gate ninyo na pirming serado, pag igwang malaog na motor o tricycle, hahapoton nindo kun may ihatod na pasehero bago ninyo buksan mantang dai man kamo ngani ga inspeksyon kan galaog na mga sasakyan. Pag magayon na awto, bukas deretso su guwardiya ninyo, dai man uro-inspeksyon. Ano man ang halaga kang seradong gate niyong iyan? Tama na kutana na dai na kamo magpaparking sa laog, sige pa insister ninyo na serahan ang gate. Ngata sisay man ang malaog ning sasakyan diyan kun bakong mahatod ning pasahero aber.
Pero di bale, na. Ito lamang na manongod sa parking fee na piga singil ninyo, simbaga niyo man daw.

Ang nagpadara:

JUAN DE LA CRUZ
Sarong siningil pero dai nagbayad kan parking fee