Catanduanes Forum

Pahayag sa Midya
27 Agosto 2009

PAGPUPUGAY AT PAKIKIPAGKAISA SA MGA LUMALABAN SA MAPANGWASAK NA COAL MINING SA ISLA NG CATANDUANES

Nagpupugay ang Nerissa San Juan Command-NPA Catanduanes sa ilalim ng pamumuno ng Partido Komunista ng Pilipinas sa lahat ng sektor na todong tumututol sa pagmimina sa ating probinsya lalo na sa Simbahang Katoliko sa pangunguna ni Bishop Manolo delos Santos, ganun din sa mga lokal na opisyal ng probinsya at ilang indibidwal, organisasyon na mapagmahal sa kalikasan na walang pagdadalawang isip na tutulan ang anumang pagtatangka ng pagmimina dito sa probinsya partikular ang ginagawa ng Monte Oro na konektado sa mga Arroyo.

Nararapat lamang na tutulan ang ganitong plano ng Rehimeng Arroyo kasabwat ang kanyang mga alipores dahil ito ay magdudulot lang ng kapahamakan sa buhay ng mamamayang Catandunganon. Huwag nating lubayan ang paglaban dahil nakasalalay dito ang kinabukasan ng buong Catandunganon. Wawasakin lang nito ang ating likas na yaman na siyang pinagkukunan ng kabuhayan ng karamihan ng mga kababayan natin. Malaki ang posibilidad na pagnatuloy ang pagmimina ay unti-unti na lulubog ang ating isla at tuluyang mapawi ito sa mapa ng Pilipinas. Magkakaroon ng dislokasyon sa kabuhayan, pagkawasak ng kagubatan, magiging mas madalas ang landslide, magkakaroon ng malawakang polusyon sa hangin at tubig at marami pang nakamamatay na epekto ng minang ito. Tulad na lamang ng nangyari sa China na marami ang nalason dahil sa lead poisoning na dulot ng pagmimina. Ang lead ay humalo sa hangin at sumamang bumagsak sa ulan na siyang ikinaapekto sa tao. Aabot sa 300 ang sabay-sabay na nahospital dahil dito. Sa Rapu-rapu, kalunos-lunos ang sunud-sunod malawakang fish kills dulot ng tailings o basurang kemikal na dumadaloy mula sa mina papunta sa dagat na umabot pa sa Sorsogon ang epekto nito. Di na makapagtanim ang mga magsasaka dahil di na tumutubo ang pananim lalo na malapit mismo sa site. Ang mga tao, partikular ang mga bata ay may mga lumilitaw na mga sakit sa balat. Wala ng mahuling isda ang mga mangingisda dahil nasira na nito ang natural habitat ng mga isda sa ilaim ng dagat. Nanakawin lang ng mga kompanyang ito sa pagmimina ang ating likas na kayamanan. Malinaw na sa lahat na mga pagtatangkang ito ay hindi naman nakikinabang ang mga mamamayang Catandunganon, yaong mga nasa poder at mga kapitalista lang ang nakikinabang dito na dapat ay gamitin para sa kaunlaran ng buong probinsya na maglilingkod sa kagalingan ng mga mamamayang Catandunganon. Habang ang sistemang panlipunan ay nakatali sa malapyudal at malakolonyal ay patuloy na mangyayari ang ganitong kalakaran hindi lamang sa usaping mina kundi sa lahat ng usapin pabor sa iilang naghaharing uri na may control sa pulitika at ekonomiya sa ating bansa sa dikta ng dayuhang bansa lalo na ang Estados Unidos.

Ayon sa datos ay may lawak na 7,000 ektarya ang saklaw ng miminahin sa lugar ng bayan ng San Andres, Caramoran, Panganiban. Aabot ng 6.2 bilyon ang tantyang halaga ng makukuha na mineral na ayon mismo sa Monte Oro na siyang nagsasagawa ng mining operation na pag-aari ni Enrique Razon Jr na kilalang kalapit ni Mike Arroyo. Dahil sa maganda ang klase ng coal ditto, Class A siya at malaki ang nakitang deposito ng mineral ay dumagdag pa ng 8,000 ektarya na sasaklawin ang 14 na barangay sa Panganiban at Viga na tinatantyang aabot sa 9.4 bilyon ang makukuhang mineral.

Sa kabuuan ay aabot ng 15,000 ektarya ang sasaklawin ng nasabing mina sa coal at magkakaroon ng aabot sa 15.6 bilyong halaga ng coal ang kikitain ng Monte Oro batay sa ligal na data at malaki ang posibilidad na dumagdag pa ito sa transaksyong lihim. Kung ang ganitong halaga ay ang mamamayang Catandunganon ang mamamahala ay malaking ambag na ito sa pagsulong ng ekonomiya sa ating probinsya. Magagamit na ito para mapaunlad ang kabuhayan ng mga tao at pati na rin ang serbisyong panlipunan tulad ng sa kalusugan, edukasyon, transportasyon at marami pang iba. Pero kailanman ay hindi ito mangyayari pagkat mapupunta lang ito kamay ng Rehimeng Arroyo at sa kanilang mga kasabwat na kapitalista at mga alipores nito. Nilalantad lang ng mga ganitong aktibidad ang kaswapangan at walang pagkakontento ng Rehimeng Arroyo sa kayamanan, iligal man itong pamamaraan, kapalit man nito ang pagkawasak ng kabuhayan ng mga mamamayan at pagkawala ng maraming buhay.

Sa ganitong kalagayan, hindi na kataka-taka na gumamit ng dahas ang rehimen maisakatuparan lang jto ang mga plano. Nandyan na ang pagdami ng pulis, militar at CAFGU sa lugar para maproteksyonan ang nasabing kompanya at maisagawa na nang tuluyan ang pagmimina. Dahil sa kapangyarihang chain of command ay bulag na sumusunod ang mga militar at pulis kahit na ang masakripisyo ay ang kapakanan ng mamamayang pinanggagalingan ng pasahod nila na ikinabubuhay ng pamilya nila.

Wala nang maaasahan ang mga Catandunganon para maproteksyonan ang kanilang interes kundi ang sarling lakas para tutulan at labanan ang pagmiminang ito. Magkaisa, mag-organisa at magpatatag ng sariling lakas at yakapin ang landas ng demokratikong rebolusyon na isinusulong ng rebolusyonaryong kilusan sa gabay ng Partido Komunista ng Pilipinas at ang kanyang sandigang armadong pwersa ay ang Bagong Hukbong Bayan upang wakasan ang lahat na di makarungan at di makataong pakana ng reaksyunaryong gobyerno sa pangunguna ng pasista, kurakot at sinungaling na Rehimeng Arroyo. Sa hinaharap, tayo ay makawala sa sistemang mapang-api at mapagsamantala na pinatatakbo ng mg asyendero at mga malaking burgesya kumprador sa dikta ng imperyalistang bansa lalo na ng Estados Unidos.

Kaya dapat gamitin ng mamamayang Catandunganon ang lahat ng porma ng paglaban sa pagmiminang ito. Huwag nating hayaan na dustain ang ating mahal na bayan. Bukas ang NSJC sa lahat ng sektor na makipagkaisa para labanan ang anumang tangkang pagmimina. Handa rin ang NSJC na tumanggap ng anumang suporta upang mapalakas ang armadong pakikibaka na siyang sandigan para wakasan ang tanikala at gapos ng pagkaalipin ng sambayang Pilipino, partikular ng mga Catandunganon sa kuko ng mapagsamantalang uri sa lipunang Pilipino.

Mamamayang Catandunganon, magkaisa!
Mapangwasak na pagmimina, labanan!
Demokratikong Rebolusyong Bayan, isulong hanggang sa tagumpay!
Pasista, kurakot at sinungaling na Rehimeng Arroyo, ibagsak!
Mabuhay ang mga Catandunganon na mapagmahal sa kalikasan at bayan!
Mabuhay ang CPP, NPA at NDF!

THERESA MAGTANGGOL
Tagapagsalita