Catanduanes Forum

CELY WONG, PABORITONG GUEST O BISITA SA MGA OKASYON

Sunod sunod na garu pang artista an schedule kan aspirante pagka Congresswoman na si Cely Wong. Sa bulan na Abril, manlaenlaen na organisasyon o grupo an nag-iimbita sainya sin urualdaw, dakulon pang nag-aabot. Kan nakaaging Abril 5, saro siya sa mga imbitadong bisita sarong okasyon na ginibo sa Buyo Plaza. Abril 8, alas 3 nin hapon kasu udma, nahiling ta man siya sa Blessing o opisyal na pagbukas kan Bagsakan Center sa Capilihan. Sa Abril9, alas 2 nin hapon, siya maatendir kan Easter Fun Dance sa Rakdell Inn. Kinabanggihan kan parehong aldaw, alas 7 nin banggi, pagkatapos nin okasyon sa Rakdell Hotel, siya madiretso sa Brgy. Dugui Too para sa saro man na okasyon. Abril 10, eskedyul ninda nin Motorcade buda Proklamasyon sa Baras.. Pagkatapos sa Baras, balik Virac siya para sa imbitasyon nin Palnab Del Norte sa oras na alas 7:30 nin banggi. Sa parehong aldaw, pag-abot nin alas 9, dagos naman siya nin Hawan Ilaya. An huri sa saiyang listahan sa semanang ini hanggang sa otro semana iyo an Candidates Forum na gigibohon sa Abril 16, alas 6:30 nin banggi para sa Municipal Level, buda Abril 17, parehong aoras, para sa Provincial Level. Piglalaoman na mas dakol pang imbitasyon an maabot sa mga masunod pang aldaw.

GOV. CUA PINANGENOTAN AN OPENING, LAUNCHING AND BLESSING KAN BRGY. CAPILIHAN BAGSAKAN CENTER

Pinangenotan kan gobernador an opisyal na pagbukas kan Bagsakan Center kaso udma, alas 3 nin hapon sa Brgy. Capilihan. Ini inorganisa nin grupong K4 o Kapatiran, Kaunlaran, Kilusan ng mga Kababaihan sa Mislagan-Capilihan. An Bagsakan Center na ini o talipapa mahihiling sa enotan nin Petron station kataning nin Powerdrive Motors. Ini magiging bagsakan, talipapa, warehouse o storage room nin mga gulay, prutas, sila na ipapabakal sa hababang presyo kumpara sa merkado sa dahelang sa ini maghahale sa fish pond. Sa Ribbon Cutting Ceremony matingkad an mga kolor na puti, blue and yellow motif na pinagpartesiparan man nina Agriculturist Toy Gianan, Capilihan Brgy. Captain Danilo Villanueva, Manay Cely Wong, Provincial Agriculturist Herbert Evangelista, DTI Director Ireneo Panti, Kagawad Raffy Zuniega. Sa programa, nagtao nin duwang kanta an grupong K4 sa pagpasalamat sa Gobernador sa saiyang tuwang kaibanan an Dept. of Agriculture, R5 and PLGU Catanduanes na nagreyalisar kan proyektong ini. Sa tinaong mensahe kan Gobernador, saiyang sinabi na awat nang naghahanap an grupong ini nin lugar na pagtutugdukan kan talipapa hanggang sa mahiling an lokasyon na ini sa Capilihan na naginmg talipapa na man kan nakaaging 15 hanggang 20 taon kaidto. Sinabi niya na an pagtuwang na ini sa K4 nagtao nin dakol na issue. An daga na kinatugdukan kan talipapa binakal ninda, investment kan saiyang agom na ipaarkila sa k4. Sa mga siyung nagruluwas, saiyang sinabi na di baling mataw an nin issue basta mauswag an capilihan na pigsasabi niyang dae mabagsak. An sarong million kun bako para sa Bagsakan Center mapupunta sa iba. Ini grant o tinao bakong utang pang agricultura. Hale man sa DOLE an 200 thousand para sa saro pang proyekto sa Mislagan an Abaca Twine Making. Pinakahuring parte an blessing ni Fr. Ed. Zafe sa bilog na talipapa.

DATING VICE MAYOR RAUL PANTI, IIWASAN AN VOTE BUYING

No to vote buying. Ini an gigibohon kan dating Bise Mayor na ngunyan minabalik sa dating pwesto na si Raul Panti. Nagpopoon na man mangampanya an dating Bise Mayor. Patunay kaini an mga nahiling tang campaign materials sa saiyang harong sa Gogon asu udma. Saiyang sinabi na dae niya gusto an vote buying o pagbakal nin boto nin mga botane kun kaya ini an saiyang ikinalamang sa saiyang mga kalaban. Sabi niya, an pinakamagayon maghiwas ng todo ay ang pinakahuring kinseng aldaw bago mag-eleksyon. Siya independyente, daeng dinadarang halangkaw na kandidato, sa dahilang saiyang sinabi, na habu niya nin kuntinwaran o magkakapot sa liog niya sa kun siya man manggana. Gilummdom niya pa an saiyang mga inibahan na Mayor kaidto, si dating Ribong Sarmiento na kan saiyang inibahan nangganang Mayor pati man si Cito Alberto. Sa ngunyan, an saiyang Mayor si Idoy Tablizo. Pig-eendorso niya man an 125-BIDA Party List o Batang Iwas Droga. An saiyang pinaggigibo sa mga panahon ngunyan, nag-aataman kan saiyang farm sa Palta buda saiyang daga sa Igang kasabay kan saiyang pangampanya. Saiyang sinabi na an enot niyang prayoridad ay ang blood-typing project o ang paghanap o pagsolicit nin dugo sa mga donors tanganing igwang supisyenteng supply an hospital o ang Rural Health Unit. Tanganing mag-abot sa panahon na bako nang problema an dugo kun kaipuhan isalang sa nangangaipong pasyente.

MANOLO SANCHEZ, DAENG PLANONG MAGWITHDRAW SA SAIYANG KANDIDATURA

Maugayon an pagmati ni Congressional Candidate Manolo Sanchez sa saiyang pagbalik sa Catanduanes. Sul-ot niya kasu udma an pigsasabing lucky shirt o polo na kulay blue na iyo man kolor na piggagamit niya sa kampanya. Naenot nang napabareta asin pig-iistoryahan an sainya diumanong planong magwithdraw. Pero saiyang sinabi na padagos an saiyang kandidatura asin dae siya ni anong plano mag atras. An mga nagluluwas na tsismis, saiyang sinabi, na pakana lang kan saiyang mga kalaban sa pulitika. Ini sarong BLACK PROPAGANDA, pahayag ni Sanchez. Iprinisentar sako an saiyang bag-ong headquarters, mas dakula, mas kumpleto, mas mayang, asin mas dakol an tawo kumpara sa dati niyang hadquarters sa Gogon. Sabi kan saiyang mga tawohan, matapos huminali an dati niyang apat na pinagkatiwalaan na tawo naging mas magayon an padalagan kan bag-ong manihamyento na nagkakapot sa kandidatura ni Sanchez. Mga bag-ong pandok o empleyado an nagpapadalagan kan opisina niya ngunyan. Saro na dindi si father Sid na kaparyentes ni Sanchez. Sabi ninda mas mgayon na sadiling pamilya an nagkakapot nin kampanya sa dahilang namamaanan ninda asin nakokontrol an kada detalye sa kandidatura ni Sanchez..

INONG, IKINAUGMA AN DESISYON NI MARIAN SORRA NA MAGWITHDRAW

Ikinaugma ni Inong Sorra an baretang planong pagwithdraw ni Marian Sorra sa kandidatura bilang kagawad nin Virac. Kan nakaaging aldaw, sa satuyang interview ki Marian, saiyang sinabi na siya magwiwithdraw o dae na ipapadagos an kandidatura sa kagustuhan kan siyang mga tugang. Ini pabor sa tiyuon na si Inong na nagdadalagan man sa parehong posisyon. Turog kan satong maabutan si Inong Sorra sa saiyang harong sa Bigaa. Sabi niya, nagtuturog siya pag aldaw pambawi sa mga puka nin pangampanya sa bilog na banwaan. Good News para sainya an pagwithdraw ni Marian sa dahilang sabi niya, dae na mababanga an suporta nin saindang pamilya. Alagad sabi niya, maski pa magwithdraw si Marian, dae na mahahari an saiyang pangalan sa balota sa dahilang ini nakaprint na. Pero isasabi niya na sana na saro na sanang Sorra an magpapadagos nin kandidatura sa eleksyon pagka-kagawad. Saiyang sinabi na dae pa sindang paghururon na pormal ni Marian, pero naniwala siya na sa maabot na aldaw magkakaulay sinda manungod sa pagsuporta ni Marian sa tiyuon. Si Marian saro nang ina, na saiyang sinabi, an budget na dapat gagamiton niya sa kampanya inenegosyo na sana. An tiyuon na si Inong padagos na nangangampanya ngunyan asin sa mga masunod pang aldaw.

MGA MAHAB ON NIN MOTOR PIGTATAKUTAN

Dakulon sa ngunyan an nagrereklamo dahilan sa pagkawara nin saindang motorsiklo. Na maski luma o gamit na dae pigpapatawad kan mga mahab on. Sarong insidente kaini an pagkawara kan motorsiklo nin sarong empleyado nin FICELCO. An sabi kan biktima, nakaparada an saiyang motorsiklo sa tampad kan capitol building hanggang sa dae na niya ini nahiling pa sa dating pinaradahan. An motorsiklong ini bago pa, dae pang pirang bulan nin gamit buda saiyang pighuhulugan hanggang sa mga panahon na ini. Sabi kan manihamyento kan FICELCO, magkapiramg aldaw na dae naglaog an empleyadong ini para hanapon an saiyang motorsiklo. Sa Calatagan, sarong residente man an nagsabing nawara an saidang motorsiklo na matapos an pirang aldaw, nadakop ninda an naghab on kan saiyang motor na diumano pagkakua, dinara sa Viga, pinagbabaklas an mga parte asin pinabakal. Pakakua ninda kan suspek, ini pinatawad man sana ta kaapelyido o ka paryentes pa ninda. Marurumduman man na kan nakaaging bulan, sa kalsada nin Sto . Domingo pasiring sa Bigaa, sarong residente nin palta Salvacion na habang nagmomotor ay hinabol kan mga nagmomotor man na dae namimidbid na kalalakihan. Sa saiyang sabi, gamit niya an bako na man na magayunon na motor, o gamit na nin magkapirang taon, kaya ini sa saiyang hiling an dahilan kun nata tuminunong an naghahabol saiya. Patanid nin PNP na i-lock an motor, iparada sa tamang lugar asin dae paghubon an susi sa pinaradahan maski pa saglit lang na oras.

MARIAN SORRA MAWITHDRAW PAGKA-KAGAWAD PABOR SA TIYUON NA SI INONG

Alas dos nin hapon kan pigdumanan mi sa saiyang harong sa San Isidro Village si former SKMF President Marian Sorra. Siya saro sa traynta y tres na kandidatong nagfile nin kandidatura sa pagkakonsehal nin Virac. Alagad saiyang sinabi na bilang pagsunod sa kagustuhan kan sainyang mga tugang, napagdesisyonan niyang magwithdtaw o dae na ipadagos an sainyang kandidatura. Ini matapos siyang pakiulayan nin saiyang mga tugang na dae na magdagos sa eleksyon para inegosyo na sana na dapat kutan-ang P200 hanggang P400,000 nindang budget. Saiyang sinabi na sobrang pabor sa sainyang pagdalagan an saiyang ama pero inako niya man an kagustuhan kan saiyang mga tugang kaya sa huri, kan bulan pang Pebrero, napagdesisyonan niya nang mag-atras. Ini magiging pabor sa saiyang tiyuon na tugang man ni kagawad Nonong Sorra na si Inong o Higino sa tunay na ngaran. An sabi ni Marian, awat ng aram kan kampo ni Inong nag saiyang pag-atras. Samantala, si Nonong, na awat ng serbidor nin Virac, segun sa saiyang agom na si Maam Delia, ay magtatrabaho sa ibang nasyon. An pagwithdraw ni Marian nangangahulugan na sa maabot na eleksyon, saro na sanang Sorra an magdadalagan pagkakagawad, si Higino “Inong” Sorra.

VINCE VILLALUNA KUMPYANSADONG MANGGAGANA SA PIRILIAN SA MAYO DIYES

“Dae kamo magamo, gaganahon ta an eleksyon”. Ini an pahayag ni dating Vice Governor Vince Villaluna sa sakuyang interview sainya kaso udma, alas tres nin hapon duman sa saiyang harong sa SIV. Saiyang sinabi, dae niya pigsasabi na siya mayaman o igwang supisyenteng imo para sa eleksyon pero sainyang nasisiguro na makukua otro an posisyon. Sainya man na iprinisentar an saiyang jingle sa background na Sabay Sabay Tayo kan sikat na aktres na si Marian Rivera. “Hanggang ngunyan dae ko pa isi kun sisay an nagkanta, pero an aram ko sana, magayunon an kanta”, pahayag ni Villaluna. Nagkakandidato man na Mayor an sainyang ina habang Vice Mayor man an kaparyentes na si Wilma Villaluna sa Bagamanoc na napabaretang naenot nang nagpledge o nagsumpa nin suporta ki Mayor Teves kan bulan na Pebrero sa Marems Pension House. Samantala, sarong atraksyon man sa harong ni Vice Governor Al Aquino an poster ni Teves na nakakabit sa saindang gate.

(KAAABOT LANG NA BALITA) TRICYCLE SUMINALPOK SA KOTSE, DRIVER DUGUAN

Alas singko y medya nin hapon kasu sarong aldaw sa upper Sto. Domingo area, sarong tricycle na nagdadara nin jingle ni Gobernador Joseph Cua ang suminalpok sa sarong sasakyan. Ini nangyari pakalampas nin tulay pababa sa Sto. Domingo Elementary School. Pababa an sasakyan habang paitaas man papunta sa tulay an biyahe kan tricycle kan magsalpukan an duwa. Igwang mga tulo nin dugo sa kaldada. Dagos man nagresponde an mga pulis. An komosyon na ini nagkawsa nin dikit na trapiko, dahilan sa nagruluwasan an mga nagtatarambay sa harong para makibalita sa insidente. Aaramon ta po an bilog na detalye kan baretang iyan sa PNP aban aban asin isasaysay ko po saindo an kabilugan kan istorya kaiyan buda iba pang updates sa aga.

MGA KANDIDATO TIME OUT MUNA SA PANGAMPANYA KAN SEMANA SANTA

Time out muna an mga kandidato sa pangampanya kan nakaaging semana. Limitado an pagpatugtog kan mga jingle sa kalsada hanging sa dae nang madadangog pag abot nin Miyerkoles Santo hanggang Sabado. Magkapira nag-iba sa prusisyon o via crucis, saro na si kagawad na ngunyan nagdadalagan na Vice Mayor Alip Abundo kaibanan kan saiyang pamilya. An tugang ni kagawad Nonong Sorra na si Inong o Higino sa tunay na ngaran, nagkakanta asin nagtutugtog nin piano sa choir sa simbahan, na arog man ki Mr. Paul Sumalde. Si Baras Mayor Teves, na ngunyan nagdadalagan na vice governor, dae man nalingwan an saiyang pagdebosyon ki El Shaddai. Si DOTC Assec asin nagdadalagan na Congressman na si Cesar Sarmiento, time out man matapos an pangampanya niya sa Baras para sa semana santa. Standby man an mga behikulo ni Manolo Sanchez sa saiyang bag-ong headquarters sa Cavinitan. Si dating Congressman Verceles buda iba pang kandidato nagsemana santa sa Manila. Nakaparada man sa harong kan Gobernador Joseph Cua an saiyang mga sasakyan. An saiyang mga tawohan kadaklan nasa cottage nin saiyang beach house. Dae man maiiwasan an mga bisita na maski na ngani semana santa nagpupunta saiya kaya an Gobernador, padagos na nakiatubang sa saiyang mga bisita kan semana santa. Balik sa normal na pangyayari an gabos poon naman ngunyan na semana.

KAHALABAAN NIN MAMANGAL BEACH PUNO KAN DOMINGO DE RESSURRECTION

Matapos kan napabaretang aksidente sa barangay Mamanagal kan nakaaging semana, puno man siyempre an kahalabaan kan baybayon kaini sa pagselebrar kan pagkabuhay liwat ni Jesus o Domingo De Resurrection o Easter Sunday. Marurumduman na bago an semana santa, sa satong naibareta sa programang ini, sarong tricycle an buminulusok sa kalsada pababa nin lower Mamangal sakay an mga naggradwar estudyante nin Magnesia National High School. Pero, bilang sarong magayon na atraksyon, an mga resort o baybayon kan beach na ini okupado nin mga nag-ekskorsyon, mga magbabarkada, magkakapamilya, o magkakaopisina. Lambang cottage okupado, an iba sa irarom nin kahoy, an iba igwang dalang tent o dakulang paying. Sabi kan mga parabantay o care taker kan mga beach digdi, an easter Sunday saro sa mga aldaw kun saen dakulon an nagpapadagat o nag-eekskorsyon.

KAPISTAHAN NI SENIOR SAN VICENTE, NAGING MAAYOS

Abril 4 – 5 an kapyestahan ni Senior San Vicente. Alas siyete y medya nin aga kaso udma, dakolon ng behikulo an palaog asin paluwas nin San Vicente. Saro sa mga pigdadayo ay ang simbahan na kun saen dakol na deboto an nagpupunta para magsindi nin kandila, maghorop horop, magdasal o magsimba kaibahan an saindang pamilya. Pagkaudto mas duminakol an tawo, nakikipangudto da mga kamidbid o kaparyentes. Sa lugar na ini nag-iistar an dating kapitan nin Ibong Sapa ana ngunyan nagkakandidatong kagawad nin Virac na si Zaldy Sarmiento. Uya man an harong kan dati tang pag-iriba digdi na Radio Aannouncer na si Vincent Villar na ngpabunyag nin saiyang matuang aki sa saiyang agom na si Joy. Dae man nin nanotaran na iriwal, aksidente o anu man na maraot na insidente sa kapistahan na ini.

SURFING AND WALL CLIMBING CLINIC NI BARAS MAYOR TEVES,
DAGOS NA DAGOS NA

Komporme, Abril disi sais, and eskedyul kan pinakaenot na Surfing and Wall Climbing Clinic na saro sa proyekto ni Baras Mayor Bong Teves. An aktibidad na ini maagang pinagplanuhan kan LGU Baras poon pang Enero ngunyan na taon. Sa Inisyal na plano, sampolokada munisipyo, baynte kada organisasyon, kaiba na an iba pang ma volunteer para dindi an makikisumaro. Pebrero kan presenteng taon na pagmeetingan an bagay na ini, kaibahan an DTI na nirerepresentar ni Director Ireneo Panti, Carmel Garcia para sa Provincial Tourism Office, mga myembros kan media para sa diseminasyon kan impormasyon pati mga lideres kan mga inimbitahan na grupo o organisasyon sa Marems Pension House. Baynteng surf boards an nakahanda, para sa tolong aldaw na surfing and wall climbing clinic na ini. Magkakaigwa man nin beach party sa Puraran Baras sa ikahuring aldaw na tutugtugan kan mga piling banda sa probinsiya.

CELLPHONE PATI INTERNET, PIGGAGAMIT NA MAN NA PROPAGANDA KAN MGA LOKAL NA PULITIKO SA PROBINSIYA

Bako sana sa text an paagi nin pangangampanya kan mga pulitiko o saindang supporters kundi pati sa internet. Saro sa mga pinaakapopular na website an facebook na kun saen mahihiling an manlaenlaen na pangangampanya kan mga kandidato poon congressman hanggang konsehal ninkada banwa. Enot na nanotaran an pagbag-o kan saendang profile picture o an litrato na enot na nahihiling pag pigbubuksan an saindang account o pag sinda naghuhubon nin comment. Nakakahang man an saindang mga litrato sa lugar na saandang kinakampanyahan na garu telebisyon an luwas. Urualdaw man an hubon nin post manungod sa mga updates kan saindang lakaw. Saro pang website an Catanduanesforum.com kung saen arog kan facebook, ini binibisita kan mga Catandunganon sa bilog na kinab’an. Mahihiling sa website na ini an kanya kanyang komento nin mga botanate sa saindang kandidato sa nasyonal pati local na borotohan

MANLAENLAEN NA PANGAMPANYA, NAGPOON NA

Marso bente sais ay opisyal na aldaw para sa pangangampanya kan mga local na kandidato sa probinsiya. Sa enot na semana, pinun’an ini nin mga motorcades nin magkalalabang partido. Naenot na an partido liberal na sinundan nin Partido Nacionalista, asin Lakas Kampi CMD kan nakaaging semana. Nakadukot na man asin padagos na nagdudukot nin posters sa kalsada, nagh’house to house, o nagtatao nin polyetos kaibahan an t-shirt, cap, wristband, o pamaypay na igwang pangalan kan kandidato. Ini ginigibo sa bilog na probinsiya. Saro saro na man na nagbubukas an mga headquarters. Dakulon na tawo particular na mga hobenes an nagkakaigwa nin trabaho sa paagi kan mga kandidatong ini. Maski sain ka man makakadangog nin mga okasyon sa manlaenlaen na baranggay. Kun papansinon, dakulon na tawo an nagluluwas sa kalsada, mas dakulon an behikulo kumpara sa mga ordinaryong aldaw. Kanya kanyang jingle an madadangog sa kalsada pati radyo. Piglalaoman na mas magiging presente an trapiko sa poblasyon sa mga masunod pang mga aldaw.

DPWH MAGKAKAIGWA NIN TASK FORCE BAKLAS PARA SA ELEKSYON

An DPWH Catanduanes Engineering District kaibanan ta sa pagsigurado nin sarong maayos o matuninong na eleksyon sa Mayo dyes kan presenteng taon. Ini an serbisyo publikong itatao kan ahensiya matapos sindang makaresibe nin resolution hale sa COMELEC, pig-aapod na Resolution No. 8781 na nagsesedignar nin Task Force Baklas para mamantinar an kalinigan kan kapalibutan. Piglalaoman na makiumayon an gabos na kandidato sa operasyon na ini. An saindang mga posters o iba pang propaganda materials ay dapat duman lamang sa mga otorisadong lugar. Sa paagi kan Task Force Baklas na gigibuhon sa lambang munisipyo, an mga posters nin kun sisay man na kandidato pwedeng tangkason pag ini bako sa tamang lugar.

kriszle_teope@yahoo.com