Catanduanes Forum

Dakula An Posibilidad nin Failure of Election Segun ki PPCRV sagkod NAMFREL Provincial Coordinator Fr. Boyet Gapaz.

Diit na aldaw na sana, aldaw na nin pirilian. Pero sa satuyang pakkikipag-ulay ki Fr. Gapaz, Provincial Coordinator nin PPCRV sagkod Namfrel, dakula an posibilidad nin failure of electon sa Mayo Diyes. Sabi niya, diit sana an posibleng makaboto, bakong gabos nakaaram ning panibag-ong sistema ning otomasyon o dakol an magiging imbalido sa balota sa kakulangan nin kampanya sa pagtukdo kaini. Maski na ngani igwang pig-gigibong voter’s education sa bilog na probinsiya, dae man siyempre kaini maabot an kabilugan nin populasyon na maboto sa eleksyon lalo na su mga nasa harayuon na lugar o mga dae naaabot kan transportasyon o komunikasyon particular sa Norte. Diit na panahon na sana an natatada para sa kampanyang ini kan BEI na dapat makalakop sa gabos na banwaan nin bilog na probinsiya. An dapat tutukan kan voter’s education na ini, saiyang sinabi, an mga gurang na natood o nasanay na sa dating sistema nin pagboto. Dae man siya pabor sa pigsasabing clustering nin mga presinto sa dahilang magiging kumplikado an proseso nin pagboto. Halimbawa, kun icluster o ibiyo an anom na presinto, sa 1000 botante kada presinto, kulang an sarong makina o PCOS machine na mabasa nin boto kaini na dapat sunudon an sarong makina sa lambang presinto, Normal nang igwang tagabantay sa lambang presinto o pig-aapod na poll watching pero saiyang sinabi na mas magayon kun magkakaigwa nin Voter’s Assistance Desk n asana, sa mga presinto na makataong asistensiya sa mga dae pa masyadong pamilyar sa sistema nin otomasyon lalo na ngunyan na duwang ruler kahalaba an papel na pagpipilian nin kada botante sa eleksyon. Sainya man na tinataw-an nin pagirumdom an mga padi na bawal mag-endorso nin kun sisay man na kandidato.