Catanduanes Forum

“BUHAY”
Ni: John Torres

Kawangis ng kandila buhay mo kapatid,
Nagbigay luha’t liwanag sa ating daigdig,
Matapos mailuwal at magbigay pag-ibig,
Maglalahong-bula ang awit mo at himig.

Ika’y kastilyong buhangin sa dalampasigan,
Sa lakas ng alo’t unos pisngi mo’y nahagkan,
Kung ika’y suwail sa Diyos walang paggalang,
Ika’y muling babalik sa lupang pinanggalingan.

Katulad mo ay bulaklak sa hardin ng Eden,
May iba’t ibang talulot at gandang angkin,
Ngunit ika’y sinisira ng uod na mainggitin,
Tangkay ay pinutol at buhay mo’y inangkin!

Ang buhay ay tulad rin nang tula ng makata,
May lambing at indayog sa harpa at gitara,
At sa bawat pagbigkas sa iyong mga talata,
Unti-unting nalalapit ang wakas ng simula.

O buhay, katulad mo ay sanga-sangang daan,
May madilim, masikip, liko-liko at maluwang,
Ngunit kung ang buhay mo sa Diyos ay laan,
Ang buhay mo ay tunay, walang kamatayan!