Catanduanes Forum

Harob

Kung kikitaon ang mga para harob sa kilang paor – otro na pag pusak sa molye gamit ang maso, baga ka man sana ga kita ning para bayle sa kilang adagyo. Yo laganting ning hagpos boda yo lasik ning manok – manok habang iga bomba yo tayhup baga man sana ga cha-cha na sadong sarang agi masisirapid na.

Pero bokong arog nintoyan kadari ang mag panday. Sa akong obserbasyon ikan man arte, ikan man ning gilok. Yan pag hurma ning tabak pilang togno man ning singot ang maga kirisi-kisi pag tuminogno sa ga baga-bagang laysang. Ting ting! Tang! Ting ting! Tang! hantong tonog na too ang musika na nadodongo sa haroban. Paka pokpok ibarik na naman sa sungo para mag baga na naman tapos tatayhupan. Sa oras na too ga loog yan sirinyawan boda minsan seryosong huron huron ning mga panday.

Pag nabuo na yan palas, minasbad, sandoko, ang pinaka dipisil ang pag lukas. Ang serbi ning tabak asa lukas. Yo pag bontog sa tubig boda pag barik sa karayo boda kung painano hinurma adun minaluwas yan lukas. Ang lukas kung sa taho iso to yan tadom ning isip. Maski mag ngonor paminsan pero sa dwaging tais minabarik man siyempre ang tadom. Pero ngani sa iba maski inanong tais kung ang isip o tabak maing lukas mai to pwedeng ipang hilap. Ang paghilap iso yan abilidad na sapsapon ang mga kaipuhan boda isabod ang mga isasabod. Ta kung mai kang lukas, maski inano mong taga ta mangonor ang imong gamit maski amorseko mai mo maootod.

Huna ta sana paor – otro yan kilang gibo pero testingan tang giboon ang gibo nila ta madyag kung maka buo kita maski lansitas sana. Iba iba ang taho, iba iba ang propesyon.Iba iba ang urag, iba iba ang amoma. Di numero ang hiwas ning taho pero pag inibahan mo ning paagi, paningot boda puso, arog sa para harob maka hurma kita ning tabak o anuman na bagay na maka tabang sa atong sadili boda sa komunidad na naka impluwensiya sa atong mga hiwas.

Ang tadom ning sadong taho maaaraman boko man sa lanit ning dila o sa lasngag ning badil, kundi sa ga luwas na madiag na tataramon sa kimot. Ang tadom ning sadong grupo boko man na sa pag arog kundi sa surog ning suporta.

Ang pag harob harayong grabe sa mga para arog.